Presidenti amerikan Donald Trump ka deklaruar se gjatë mandatit të tij ka “përfunduar shtatë luftëra të pafundme”, duke përfshirë edhe konfliktin mes Kosovës dhe Serbisë.

Në një fjalim ku u mburr me përpjekjet e tij diplomatike, Trump përmendi shtatë raste ku, sipas tij, ka ndalur luftëra ose ka zgjidhur tensione: Kamboxhia dhe Tajlanda, Kosova dhe Serbia, Kongo dhe Ruanda, Pakistani dhe India, Izraeli dhe Irani, Egjipti dhe Etiopia, si dhe Armenia dhe Azerbajxhani.

Trump kritikoi Kombet e Bashkuara, duke thënë se nuk kishin luajtur asnjë rol në proceset e paqes.

“Është shumë keq që më është dashur t’i bëj unë këto gjëra në vend që t’i bënin Kombet e Bashkuara. Për fat të keq, në të gjitha rastet, ata as që u përpoqën të ndihmonin”, u shpreh ai.

Sipas tij, shumëkush mendon se ai duhet të marrë Çmimin Nobel për Paqen, por Trump shtoi se “çmimi i vërtetë” është fakti që miliona njerëz jetojnë sot pa rrezikun e luftës./Telegrafi/