Policia e Kosovës në Prizren ka sekuestruar katër armë zjarri gjatë javës së fundit në raste të ndara në Prizren dhe Suharekë, si pjesë e operacioneve për parandalimin e incidenteve të rrezikshme dhe rritjen e sigurisë publike.

Sipas njoftimit, janë konfiskuar tri pistoleta dhe një armë automatike AK-47, ndërsa në dy raste armët janë gjetur pas informacioneve të pranuara nga qytetarë anonimë për të shtëna me armë në gazmende familjare.

Në tre prej katër rasteve, të dyshuarit janë ndaluar për 48 orë me vendim të prokurorit dhe ndaj tyre janë iniciuar procedura penale për veprat “Mbajtje, kontroll apo posedim i paautorizuar i armës” dhe “Shkaktim i rrezikut të përgjithshëm”.

Policia e Kosovës ka ritheksuar se të shtënat me armë në ahengje familjare nuk tolerohen dhe se do të vazhdojë veprimet për parandalimin e posedimit të paligjshëm të armëve dhe ruajtjen e rendit e sigurisë publike. /Gazeta Express