Zyrtarët doganorë të Kosovës kanë ndaluar një automjet taksi në pikën kufitare të Vërmicës, pas dyshimeve për mallra të padeklaruara. Gjatë kontrollit, janë zbuluar dy çanta të markës luksoze “Hermes”, të cilat nuk ishin deklaruar në momentin e hyrjes në territorin e Republikës së Kosovës.

Sipas njoftimit të Doganës së Kosovës, në njërën prej çantave është gjetur një faturë blerjeje që dëshmonte vlerën e lartë të mallit – 16.614 euro. Mallrat janë ndaluar përkohësisht deri në përfundimin e procedurave ligjore përkatëse.

Dogana ka rikujtuar se çdo mall i bartur gjatë kalimit të kufirit duhet të deklarohet, pavarësisht nga vlera apo natyra e tij, për të shmangur masa ndëshkuese.