Lionel Messi regjistroi mbrëmë golin e tij të 90-të në Champions.

Ylli argjentinas e ka zgjeruar, po ashtu, rekordin e tij të mahnitshëm kundër skuadrave angleze. Ai hapi rezultatin për Barcelonën, kundër Manchester City, të martën. Goli në fjalë ishte i 16-ti për të në 14 ndeshje kundër klubeve angleze.

Kujtojmë se 29-vjeçari shënoi një “hat-trick” në ndeshjen e parë, më 19 tetor, kur Barca fitoi ndaj “qytetarëve” me rezultatin 4-0, në “Camp Nou”.

Mbrëmë, Lionel Messi ka thyer edhe një tjetër rekord, duke u bërë golashënuesi më i lartë ndonjëherë në fazën e grupeve të Ligës së Kampionëve, shkruan Telesport.

Me “rrjetën” e minutës së 21-të, kundër Manchester City, pesë herë fituesi i “Topit të Artë” u ngjit në kuotën e 54 gola në fazën e grupeve të Champions-it. Tashmë, në këtë drejtim, argjentinasi është një gol para Raul, i cili e kishte udhëhequr këtë rrugë me 53 gola në fazën e grupeve, gjatë kohës së tij te Real Madrid dhe Schalke.