Pas lajmit se Lista Serbe pritet nesër të kthehet në Kuvendin e Kosovës pas disa muajsh bojkot, në Grupin Parlamentar të kësaj force politike kanë shpërthyer debate të brendshme.

Lajmi.net merr vesh se pas vendimit për kthim në Kuvend ka ndërhyrë Marko Gjuriq nga Beogradi duke tentuar që të ndikojë në anulimin e vendimit.

Kjo ka shkaktuar edhe përçarje në mesin e 10 deputetëve të Listës Serbe, të cilët pas një mbledhje të gjatë dhe të tensionuar kanë vendosur ta shkarkojnë Sllavko Simiqin nga shefi i Grupit Parlamentar.

Për shkarkimin e Simiqit, i cili njëkohësisht është edhe kryetar i Listës Serbe, kanë votuar gjashtë deputetë, në mesin e tyre edhe Nenad Rashiq dhe Jelena Bontiq.

Më pas, ata kanë marrë vendim që shef i ri i GP të Listës Serbe të jetë Sasha Milosavljeviq.

Sipas të gjitha gjasave, këta 6 deputetë do të marrin pjesë në seancën e nesërme të Kuvendit të Kosovës.

Lajmi.net ka raportuar sot më herët gjatë ditës se nesër, në seancën ku do të diskutohet projektbuxheti i vitit 2017, deputetët e Listës Serbe do të kthehen pas një kohe të gjatë. /Lajmi.net/