Sektori minerar do të trajtohet si sektor strategjik me rëndësi të veçantë për zhvillimin ekonomik dhe sigurinë kombëtare të Kosovës.

Në mandatin e ri qeverisës do të themelohen partneritete strategjike në nivel shtetëror për hulumtime dhe investime të përbashkëta në sektorin minerar, me synim shfrytëzimin e qëndrueshëm dhe zhvillimor të pasurive natyrore të vendit.

Për këtë qëllim, do të krijohet një fond prej rreth 50 milionë eurosh për skanimin e plotë të burimeve minerare dhe natyrore të Kosovës, si dhe për futjen e tyre në funksion të ekonomisë dhe zhvillimit industrial.

Trepça do të jetë në qendër të zhvillimit të sektorit minerar, ndërsa hulumtimet dhe investimet do të zgjerohen edhe në zona të tjera me potencial të lartë minerar.

Në kuadër të zhvillimit të “Trepçës”, parashihet përfshirja e një korporate minerare me përvojë të gjatë ndërkombëtare si bashkinvestitor, në bashkëpunim të ngushtë me një nga vendet mike të
Kosovës.

Lëvizja VETËVENDOSJE! e ka përfshirë zhvillimin e sektorit minerar dhe fuqizimin e “Trepçës” në zotimet e saj programore, si pjesë e vizionit për zhvillim industrial, vende të reja pune dhe forcim të ekonomisë së vendit.