Drejtori i T7, Leonard Kerquki, përmes një postimi në Facebook, ka thënë se, televizionet në vend janë duke u përballur me një presion të paprecedentë nga KPM’ja.

Në reagimin e tij, Kerquki, ka thënë edhe se, partitë politike dhe institucionet e vendit, e kanë për detyrim, që t’i largojnë nga Komisioni i Pavarur i Mediave njerëzit që nuk e kuptojnë rolin e mediave në një shoqëri demokratike, përndryshe, shton ai, rrezikohet liria e mediat dhe demokracia.

Postimi:

Tash e një muaj, të gjitha televizionet në Kosovë po përballen me një presion të paprecedentë nga KPM-ja.

Vetëm brenda një jave, jemi gjobitur me dhjetëra mijëra euro, gjë që mund ta rrezikojë seriozisht qëndrueshmërinë financiare të shumicës së televizioneve në vend.

Për më tepër, sot, anëtarja e KPM-së, Drita Morina, deklaroi se, “nëse vazhdojnë shkeljet”, duhet të propozohet mbyllja e emisionit Debat Plus.

Është detyrim i partive politike dhe i institucioneve të vendit që t’i largojnë nga Komisioni i Pavarur i Mediave njerëzit që nuk e kuptojnë rolin e mediave në një shoqëri demokratike. Në të kundërtën, ata rrezikojnë t’i shkaktojnë një dëm të pariparueshëm lirisë së medias, demokracisë dhe vetë Republikës së Kosovës.