Ish-ministri i Punës dhe Mirëqenies Sociale, Skender Reçica, ka reaguar lidhur me paralajmërimet e Qeverisë për rritjen e pagës minimale, duke e cilësuar këtë si një veprim me prapavijë elektorale dhe jashtë çdo kornize ligjore.

Sipas Reçicës, në një kohë kur vendi po përballet me paqëndrueshmëri politike dhe me mundësi reale për zgjedhje të jashtëzakonshme, ekzekutivi po tenton ta përdorë këtë temë si mjet propagandistik për përfitime politike, pa respektuar proceset ligjore që rregullojnë këtë çështje.

“Rritja e pagës minimale nuk është vendim politik, por proces ligjor që kërkon profesionalizëm, përgjegjësi dhe respektim të procedurave të përcaktuara në Ligjin e Punës. Qeveria mund ta përcaktojë atë vetëm mbi bazën e propozimit të Këshillit Ekonomiko-Social (KES),” ka theksuar Reçica.

Ai ka shtuar se KES-i, si mekanizëm tripartit që përfaqëson qeverinë, sindikatat dhe bizneset, është bërë jofunksional gjatë kësaj qeverisjeje, duke u anashkaluar në mënyrë të vazhdueshme në proceset e dialogut social.

“Ky anashkalim përbën shkelje të ligjit dhe minon vetë parimin e dialogut social. Rritja e pagës minimale është e mirëpritur kur vjen si rezultat i konsensusit shoqëror dhe ekonomik, por bëhet e dëmshme kur përdoret si premtim elektoral,” ka shtuar ai.

Në fund, Reçica thekson se punëtori i Kosovës meriton dinjitet, jo manipulim politik, biznesi meriton stabilitet, ndërsa qytetari qeverisje me përgjegjësi, duke apeluar që çdo vendim për pagën minimale të bazohet në ligj dhe bashkëpunim social, e jo në kalkulime politike./Indeksonline/