Policia e Kosovës ka njoftuar për pesë raste të dhunës në familje në 24 orët e fundit, shkruan Gazeta Express.
Në Vushtrri është arrestuar një person pasi e ka sulmuar fizikisht gruan e tij. Asaj i është ofruar ndihmë mjekësore dhe së bashku me fëmijët është dërguar në strehimore.
“Vushtrri, 17.01.2022-09:30.Viktima femër kosovare ka raportuar se bashkëshorti i saj, i dyshuari mashkull kosovar e ka sulmuar fizikisht me ç ‘rast i ka shkaktuar lëndime trupore. Viktimës i është ofruar trajtim mjekësor e më pas së bashku me katër fëmijët e sajë është vendosur në strehimore. Lidhur me rastin është arrestuar i dyshuari dhe pas intervistimit me vendim të prokurorit është dërguar në mbajtje”, thuhet në njoftimin e policisë.
Ndërkaq në Pejë është arrestuar një person për sulm fizik ndaj bashkëshortes.
“Pejë,16.01.2022-21:00. Është arrestuar i dyshuari mashkull kosovar pasi qe i njëjti ka sulmuar fizikisht bashkëshorten e tij viktimën femër kosovare. Nuk raportohet për të lënduar ndërsa, me vendim te prokurorit i dyshuari dërgohet ne mbajtje”, njofton policia.
Në Viti është arrestuar një person pasi kanosi prindërit e tij.
“Viti, 17.01.2022-10:00.Është arrestuar i dyshuari mashkull kosovar me probleme psikike pasi që i njëjti ka kanosur prindërit e tij. Me vendim te prokurorit i dyshuari është dërguar në mbajtje”, thuhet në njoftim.
Ndërsa në një rast tjetër në Viti një grua raportoi në polici sulmin fizik nga babai i saj.
“Viti, 17.01.2022-17:45.Viktima femër kosovare ka raportuar se është sulmuar fizikisht nga prindi i saj i dyshuari mashkull kosovar. Me vendim te prokurorit rasti shkon në procedure të rregullt”, thuhet në njoftimin e policisë.
Edhe në Graçanicë një shtetase e Turqisë ka njoftuar se është sulmuar fizikisht nga burri me të cilin bashkëjetonte.
“Graqanicë, 17.01.2022-13:00.Viktima femër shtetase e Turqisë, ka raportuar se është sulmuar fizikisht nga i dyshuari mashkull kosovar me te cilin ka bashkëjetuar. Nuk raportohet për të lënduar, rasti nen hetime nga njësitë relevante”, thuhet në njoftim. /Express/
