Sulmuesi i Hoffenheimit, Fisnik Asllani, ka reaguar për herë të parë ndaj zërave në rritje që e lidhin me disa prej klubeve më të mëdha të Evropës, përfshirë Barcelonën, Bayern Munich dhe Borussia Dortmund.

23-vjeçari kosovar po kalon një sezon mbresëlënës në Bundesligë, duke u shndërruar në një nga talentet më të spikatura të sulmit.

Performancat e tij nuk kanë kaluar pa u vënë re, teksa shumë gjigantë evropianë raportohet se e kanë futur në listën e tyre të dëshirave.

Asllani, në një prononcim të shkurtër, u shpreh se ndihet i nderuar nga interesimi, por se fokusi i tij kryesor mbetet te skuadra aktuale.

“Sigurisht, nuk mund të mos i vërej ato që shkruhen. Është nder dhe pak krenari që përmenden emra të tillë klubesh, por aktualisht jam plotësisht i përqendruar te Hoffenheimi,” tha ai, shkruan Gazeta Express.

“Dua të vazhdoj të jap më të mirën në ndeshjet, javët dhe muajt në vijim. Kjo është ajo që ka rëndësi për momentin. Në fund do të shohim se çfarë do të ndodhë. Gjithçka me radhë,” përfundoi sulmuesi i Përfaqësueses së Kosovës.

Ndërkohë, mediat gjermane raportojnë se Hoffenheim pritet të përfitojë ndjeshëm nga shitja e tij në verë, me një çmim të mundshëm që arrin rreth 30 milionë euro.

Barcelona thuhet se e sheh Asllanin si një opsion afatgjatë për ta pasuar Robert Lewandowskin. /GazetaExpress