Një kontribut i ri në fushën e shkencës së sportit dhe edukimit fizik vjen nga një grup studiuesish, në mesin e të cilëve është edhe Kamer Podrimqaku nga Lipjani.

Punimi shkencor me titull “Schoolbag Weight and Anthropometric Characteristics Among Primary School Children in Lipjan, Kosovo: A Cross-Sectional Study” është publikuar në revistën ndërkombëtare Journal of Anthropology of Sport and Physical Education (JASPE).

Studimi përfshin 403 nxënës të moshës 6–10 vjeç nga katër shkolla në Lipjan dhe trajton një çështje me rëndësi të veçantë për shëndetin e fëmijëve: peshën e çantave shkollore në raport me peshën trupore dhe karakteristikat antropometrike.

Sipas rezultateve të studimit, 74.9% e nxënësve kishin çantat shkollore me peshë mbi 10% të peshës së tyre trupore. Këto rezultate theksojnë rëndësinë e ndërgjegjësimit të prindërve, mësimdhënësve dhe institucioneve arsimore për ndikimin e mundshëm të ngarkesës së tepërt të çantave në shëndetin dhe zhvillimin fizik të fëmijëve.

Në këtë punim, Kamer Podrimqaku është bashkautor së bashku me Besim Halilajn, Hasim Rushitin, Artan Kryeziun dhe Ilir Gllarevën.

Ky publikim përfaqëson një kontribut me rëndësi në hulumtimin shkencor në fushën e edukimit fizik dhe sportit, duke sjellë të dhëna konkrete nga shkollat e komunës së Lipjanit dhe duke nxitur vëmendjen ndaj mirëqenies së gjeneratave të reja.