Hysni Gucati lidhur me vendimin e Gjykatës Speciale për të mos lejuar Salih Mustafa që të vizitojë babain e tij, i cili ndodhet në gjendje të rëndë shëndetësore në spital.
“Vetë Salih Mustafa nuk është mirë me shëndet, pasi vuan nga diabeti i tipit 2. Merzia dhe stresi vetëm sa ia rëndojnë edhe më shumë gjendjen shëndetësore. I bëj apel ministrive përkatëse që të reagojnë sa më shpejt, sepse nesër mund të jetë tepër vonë. Nëse babai i Salih Mustafës ndërron jetë pa arritur ai ta shohë për herë të fundit, kjo do të ishte shumë vonë,” tha Gucati në T7.
Ai shtoi se është jashtëzakonisht e vështirë për të burgosurit kur mendojnë se familjarët e tyre janë në gjendje të rëndë shëndetësore dhe nuk e dinë nëse do ta gjejnë gjallë prindin në mëngjes.
“Me keqardhje po them se s’ka përjetim më të rëndë sesa të jesh brenda atyre katër mureve. Ditën e kalon me shoqëri, por nga ora 21:00 deri në mëngjes je vetëm me Zotin dhe me trupin tënd. Aty përballesh me dhimbje që janë të papërshkrueshme,” u shpreh Gucati.
Raste të ngjashme, sipas tij, i ka përjetuar edhe vetë, bashkë me të tjerë që, siç tha, po mbahen padrejtësisht në Hagë.
“Nuk ka dhimbje më të madhe se kjo. Ne i kemi përjetuar këto raste edhe më herët. E di çfarë ka vuajtur shpirti i Nasim Haradinajt, presidentit Hashim Thaçi, Bacit Jakup Krasniqi e të tjerëve. Të gjithë i kemi përballuar vdekjet e familjarëve sa ishim në burg,” tha Gucati.
