Policia e Kosovës ka arrestuar një person në Prishtinë, i dyshuar për përdorimin e pushkës së gjuetisë.

Sipas raportit zyrtar, i dyshuari dyshohet se ka shtënë me pushkë gjuetie në drejtim të një qeni, i cili ishte futur në oborrin e tij. Qeni është pronë e ankuesit, i cili është fqinj me të dyshuarin.

Në vendin e ngjarjes, njësitet policore kanë gjetur dhe konfiskuar një pushkë gjuetie, pesë fishekë dhe një gëzhojë, të cilat dyshohen se janë përdorur gjatë incidentit.

Pas intervistimit dhe konsultimit me prokurorin kompetent, i dyshuari është liruar në procedurë të rregullt, ndërsa hetimet për rastin vazhdojnë. /Telegrafi/