Gjykata Speciale ka marrë vendim që Haxhi Shala të dënohet me tri vjet burgim, ndërsa Sabit Januzi e Ismet Bahtijari me nga dy vjet burgim.

Shala, Januzi e Bahtijari u shpallën fajtor për pengimin e personave zyrtarë në kryerjen e detyrave zyrtare përmes pjesëmarrjes në grup, midis periudhës 5 dhe 12 prill 2023.

Po ashtu, Shala, Januzi e Bahtijari u shpallën fajtor edhe për akuzën “frikësim gjatë proceseve penale”, të kryer së paku midis 5 dhe 12 prillit 2023.

“Pasi ka shqyrtuar argumentet dhe provat e paraqitura nga palët, trupi gjykues lëshon këto dënime: Shala dënohet me 3 vite burgim, Januzi me 2 vite burgim dhe Ismet Bahtijari dënohet me 2 vite burgim”, u tha në vendim, njofton Klankosova.tv.

Specialja, vendimin e arsyetoi duke thënë se Januzi dhe Bahtijari, duke vepruar nën udhëzimin e Shalës janë takuar me dëshmitarin në shtëpinë e tij.

“Gjatë kontaktit dhe kontaktit 5 prill 2023, Bahtijari i ka thënë dëshmitarit se duhet ta tërheqë dëshminë e tij përpara Dhomave të Specializuara. Gjatë takimit më 12 prill 2023, Januzi ka pasuar takimin e parë dhe i ka dhënë dëshmitarit një ofertë që Shala dhe të tjerët do ta ndihmonin atë nëse do ta tërhiqte dëshminë e dhënë”.

“Shala dhe Januzi kanë komunikuar dhe janë koordinuar me njëri-tjetrin për sa i takon veprimeve të tyre në lidhje me dëshmitarin. Bahtijari ka komunikuar dhe është bashkërenduar me Shalën dhe Januzin për sa i takon veprimeve me dëshmitarin, para dhe pas takimit me dëshmitarin më 5 prill dhe 12 prill 2023”, u tha në arsyetim.