Ambasadori i misionit të ShBA-së në OSBE, Michael Carpenter, ka thënë SHBA-ja ka pozicion të qartë sa i përket të drejtës që Kosova si shtet i pavarur të përcaktojë kushtet për organizimin e zgjedhjeve të shteteve të tjera në territorin e saj, shkruan Gazeta Express.

Në mbledhjen e Këshillit të Përhershëm të Ministrave të OSBE-së, ambasadori i misionit të ShBA-së tha se kanë shpresuar që qeveria do të vazhdonte praktikën e mëhershme që të lejojë OSBE-në t’i mbledhë votat edhe për referendumin e Serbisë

“Le të jemi të qartë për pozicionin e ShBA-së mbi të drejtat e Kosovës që si një shtet sovran dhe i pavarur të përcaktojë kushtet përmes të cilave zgjedhjet e shteteve të tjera të zhvillohen në territorin e saj. Ne shpresuam që qeveria e Kosovës do të vazhdonte praktikën e mëhershme të lejimit të OSBE-së për të mbledhur fletëvotimet e votuesve me të drejtë vote që jetojnë në Kosovë, por zgjodhën që mos ta bëjnë këtë”, ka thënë ambasadori Carpenter.

Qeveria kundërshtoi mbajtjen e referendumit kushtetues të Serbisë në komunat me shumicë serbe në Kosovë. Për këtë u thirr edhe një seancë e jashtëzakonshme ku me 73 vota për u miratua rezoluta nga deputetët që kundërshtonin mbajtjen e këtij referendumit.

Të dielën, qytetarët serbë që jetojnë në Kosovë udhëtuan në disa qytete të Serbisë për të votuar në referendum.