Fabio Cannavaro është afër që të bëhet trajneri i ri i kombëtares së Polonisë pasi Paulo Sousa u largua te Flamengo pas më pak se një viti në krye.

Ish-trajneri i Fiorentinës, Sousa u largua në fund të dhjetorit për të marrë detyrën në klubin brazilian Flamengo, pasi kishte mbikëqyrur vetëm 15 ndeshje me gjashtë fitore, pesë barazime dhe katër humbje.

Sipas ekspertit të transferimeve të Sky Sport Italia, Gianluca Di Marzio, favoriti i ri për të drejtuar Poloninë është Cannavaro.

Ish-mbrojtësi i Napolit dhe Italisë ka pasur sot një takim me zyrtarë polakë dhe negociatat po ecin mirë në Krakov.

Ai duhet të jetë së shpejti gati për të nënshkruar një kontratë dyvjeçare, transmeton Gazeta Express.

Fituesi i Topit të Artë dhe Kupës së Botës Cannavaro u pensionua si lojtar në vitin 2012 dhe filloi një karrierë menaxheriale në Al-Ahli, Guangzhou Evergrande, Al-Nassr, Tianjin Quanjian dhe ekipin kombëtar të Kinës për vetëm dy ndeshje në mars dhe prill 2019.

Alternativa të tjera për stolin e Polonisë përfshijnë ish-trajnerin e Juventusit, Andrea Pirlo. /Gazeta Express/