Në Kuvendin e Kosovës, gjatë seancës plenare, është vërejtur ngjyra portokalli. Pjesëmarrësit në Kuvendin e Kosovës këtë ngjyrë e kanë veshur, e disa prej tyre edhe e kanë lidhur në mikrofonin para tyre.

Arsyeja pse në Kuvend shihet theksohet ngjyra portokalli më shpesh se zakonisht, është për shkka të mesazhit që deputetët po e përçojnë.

Glauk Konjufca, Armend Zemaj, Time Kadrijaj, Bekim Haxhiu, Avdullah Hoti, Ganimete Musliu, Driton Selmanaj… ishin vetëm disa nga pjesëmarrësit në seancën e Kuvendit që u ngjyrosën pak me portokalli.

Pos Kuvendit, në shënim të hapjes së fushatës – 16 Ditë të aktivizmit kundër dhunës në baza gjinore ndaj grave dhe vajzave, Agjencia për Barazi Gjinore, në kuadër të Zyrës së Kryeministrit, ka ndriçuar me ngjyrë të portokalltë edhe ndërtesën e Qeverisë së Repubikës së Kosovës.

Sot paradite, Kryeministri Albin Kurti, bëri hapjen e fushatës duke bërë thirrje për gratë që të kenë më shumë solidaritet gjinor, kurse burrat më shumë emancipim për barazinë gjinore.

Ai theksoi se përkushtimi institucional e shoqëror për eliminimin e dhunës ndaj grave dhe vajzave, vazhdon çdo ditë.

Me sloganin “Ngjyrose botën portokalltë”, fushata ndërkombëtare 16 Ditë të aktivizmit kundër dhunës në baza gjinore ndaj grave dhe vajzave fillon më 25 nëntor, në Ditën ndërkombëtare për eliminimin e dhunës ndaj grave dhe zgjat deri më 10 dhjetor, në Ditën e të drejtave të njeriut.

Si pjesë e kësaj fushate, ndërtesat ikonike në mbarë botën ndriçohen me ngjyrë të portokalltë, për të sjellë vëmendje në luftën kundër dhunës ndaj grave dhe vajzave.

Ngjyra e  portokalltë simbolizon një të ardhme të ndritur dhe pa dhunë, për gratë dhe vajzat.