Trajneri i Liverpoolit, Jurgen Klopp këmbëngul se ai nuk donte të kishte mungesë respekti duke refuzuar një shtrëngim duarsh me homologun e tij të Atletico Madrd, Diego Simeone.

Simeone refuzoi t’i jepte dorën Klopp kur të dy skuadrat u takuan në Madrid para dy javësh, një ndeshje të cilën Liverpooli e fitoi me rezultat 3-2.

Reds fituan 2-0 në Anfield të mërkurën dhe këtë herë ishte Klopp ai që nuk tentoi ta përshëndeste homologun e tij.

I pyetur për shtrëngimin e duarve pas ndeshjes, Klopp zbuloi arsyen e mos përshëndetjes mes tij dhe Simeones.

“Nuk është absolutisht asnjë problem”, ka thënë fillimisht Klopp pas ndeshjes.

“E di që Diegos nuk i pëlqejnë këto lloj gjërash dhe unë nuk jam shtrënguesi më i madh i duarve në planet dhe nuk dua të mërzis njerëzit me shtrëngimin tim të duarve”.

“Atij nuk i pëlqen dhe unë nuk e bëra, por kjo nuk e ndryshon respektin tim për të dhe punën që ai po bën”, përfundoi trajneri i Reds. /Telegrafi/