Në mbledhjen e sotme të thirrur nga kryeministri i dorëhequr, Ramush Hardinaj, është diskutuar për epilogun që duhet t’i jepet çështjes së zgjedhjeve.
Ministri i Drejtësisë, Abelard Tahiri ka thënë se nuk ka buxhet për organizim të zgjedhjeve.
“Viti 2019 nuk ka qenë vit kalendarik i zgjedhjeve, si rrjedhojë edhe nuk janë paraparë edhe mjete të ndara për KQZ-në. Rrjedhimisht nuk kemi pasur dhe nuk kemi buxhet të ndarë për KQZ-në, pra s’kemi mjete të mjaftueshme nëse shkojmë në zgjedhje. Kemi ardhur në një situatë si Qeverisë që kemi me pas obligim me i nda mjetet financiare për Komisionin Qendror Zgjedhor, qysh kemi ndarë gjithë, sepse nuk është vit kalendarik siç kanë qenë të planifikuara zgjedhjet, pas dy vitesh”, ka thënë Tahiri.
Paqartësi në mbledhje të Qeverisë, diskutohet se si mund të ndahen mjete për KQZ-në, kur Qeveria është në dorëheqje
Tahiri, i është drejtuar ministrit të Financave, Bedri Hamza, që të sqarojë çështjen e buxhetit për KQZ-në.
Edhe Hamza, e ka mbështetur deklaratën e Tahirit.
“Ky nuk ka qenë vit zgjedhor dhe brenda KQZ-së nuk ka fonde për mbajtjen e zgjedhjeve”, tha Hamza.
Sipas tij, ka një fond brenda Ministrisë së Financave ku ligji e autorizon ministrin që këto mjete mund t’i bartë në një organizatë tjetër buxhetore.
Ai ka thënë se për me ndodh një transfer i tillë i mjeteve, duhet fillimisht me u shpallë zgjedhjet.
Pas kësaj ka thënë ai, KQZ duhet të bëjë kërkesë të specifikuar për mjete.
“Dhe në bazë të kërkesës, ministri mundet të bëjë transferimin e mjeteve, por edhe ministri duhet të kërkojë qartësi rreth kësaj çështje”, ka thënë ndër tjerash Hamza.
Ndërkaq, zëvendëskryeministri Enver Hoxhaj dhe dy ministrat e lartcekur kanë kërkuar që partnerët e koalicionit të ulen të bisedojnë dhe të marrin një vendim për shmangien e zgjedhjeve./Telegrafi/
