Pas harmonizimit të plotë të programit qeverisës, sot do të takohen liderët e dy partive, Albin Kurti i Lëvizjes Vetëvendosje dhe Isa Mustafa i Lidhjes Demokratike të Kosovës, të cilët do të tentojnë ta projektojnë qeverinë e re. Se sa do të arrijnë të dakordohen për pozitën e presidentit dhe për ndarjen e posteve ministrore topi mbetet te Kurti e te Mustafa,shkruan sot gazeta Zeri.
Sot kreu i Lëvizjes Vetëvendosje Albin Kurti dhe ai i Lidhjes Demokratike të Kosovës Isa Mustafa, pas negociatave disajavore, pritet ta vënë gur themelin e qeverisë së ardhshme, që do të përbëhet prej 14 anëtarëve. Përpos kryeministrit dhe një zëvendëskryeministri, qeveria e re, që sot pritet nisja e formimit të saj, do t’i ketë vetëm 12 ministri, shkruan tutje Zeri
Takimin e sotëm të LDK-së dhe të LVV-së e kanë konfirmuar për “Zërin” përfaqësues të të dyja partive, të cilët nuk kanë pranuar të japin detaje më të hollësishme për ndarjen e pozitave, por që janë shprehur të bindur se koalicioni është shumë pranë finalizimit. Njohës të rrethanave politike shprehen skeptikë se marrëveshja mund të arrihet sot, pasi “pikë e nxehtë” mes të dyja partive mbetet çështja e emërimit të presidentit pas dy vjetësh.