Pa karrige e grushte, sot përfundoi procesi i brendshëm zgjedhor i Lidhjes Demokratike të Kosovës në Vushtrri, një nga komunat me të përfolura ditëve të fundit.
Madje çdo gjë u bë sipas marrëveshjes, ku edhe për një mandat, Hysni Gërguri do ta udhëheq LDK-së në Vushtrri. Derisa kryetari aktual i komunës, Xhafer Tahiri do të jetë nënkryetar.
Siç mëson Indeksonline, ishte kryetar i Komunës së Lipjanit, Imri Ahmeti ai që pajtoi “kundërshtarët”, ku edhe shihet mes tyre në një fotografi.
Ndryshe, Ahmeti po del të jetë pajtues i mirë, pasi që ai dje gjatë procesit të brendshëm zgjedhor në Lipjan ku u zgjodh kryetar i LDK-së në këtë degë, kishte ftuar edhe Arban Abrashin e Hazir Borovcin, ku u bë thirrje për unitet dhe një gjuhe të përbashkët brenda subjektit politik të tyre./Indeksonline/
