Deputetja e VV’së, Albulena Haxhiu, ka denoncuar gjyqtarin Beqir Kalludra se ia ka ndalur Donika Kadajt komunikimin me familjarët e saj. Ka kërkuar të reagimin e organizatave që mbrojnë të drejtat e njeriut.
Anëtarja e dorëhequr e Kryesisë së Vetëvendosjes, Albulena Haxhiu ka kërkuar drejtësi për kolegen e saj, Donika Kadaj-Bujupi, po ashtu, e dorëhequr nga organi më i lartë partiak, shkruan Express.
Haxhiu ka deklaruar se deputetja që ndodhet në paraburgim po i ndalohet komunikimi me telefon me familjarët e saj. Sipas saj, një vendim i tillë bie në kundërshtim me liritë dhe të drejtat e njeriut.
“Përveç që Donika po mbahet padrejtësisht në paraburgim, asaj me vendim të gjyqtarit Kalludra, po i ndalohet edhe komunikimi me telefon me anëtarët e familjes, bashkëshortin dhe fëmijët e po ashtu me urdhër të Kalludres po i bëhen edhe ndalesa në kundërshtim me të drejtat e njeriut. Kjo është e papranueshme dhe skandaloze! Apeloj te organizatat që monitorojnë burgjet që të bëjnë thirrje për ndalimin e kësaj torture e padrejtësie!”, ka shkruar Haxhiu, në Fb.
Ndërkohë, sot, Vetëvendosje do të diskutojë për ndarjet e fundit të partisë në dy krah, atë të Albin Kurtit dhe përkrahësit e Dardan Molliqajt.
Haxhiu, por edhe Kadaj, janë në grupin që përkrahin Albin Kurtin. Dy zyrtarët e VV’së kishin dhënë dorëheqje para disa muajsh nga Kryesia e VV’së.
Ndërkohë, Donika Kadaj ndodhet në paraburgim bashkë me Albin Kurtin pasi ndaj tyre po zhvillohet një proces gjyqësor pasi të njëjtit patën gjuajtur gaz lotsjellës në Parlament.