Interi ka arritur marrëveshje me Manchester Unitedit për transferimin e mbrojtësit anësor anglez, Ashley Young këtë muaj.

Zikaltrit do t’ia paguajë Djajve të Kuq 1.5 milion euro plus bonuse, si kompensim për gjashtë muajt që i kishin mbetur 34-vjeçarit deri në fund të kontratës së tij në Old Trafford, transmeton Gazeta Express.

Interi i ka ofruar Youngut kontratë 1-vjeçare e gjysmë, ndërsa do të paguhet po aq paguhej më parë në Manchester United – rreth gjashtë milionë euro në sezon.

Pasi dështuan negociatat me Chelsean për spanjollin Marcos Alonso, Interi shpejt e ktheu vëmendjen te Young si alternativë, një lojtar që ishte kërkuar nga trajneri Antonio Conte edhe në vitin 2017.

Young pritet t’i bëjë së shpejti testet mjekësore, ndërsa transferimi pritet të finalizohet dhe të zyrtarizohet gjatë fundjavës.

Anglezi i ka bërë 18 paraqitje në të gjitha garat për Manchester Unitedin këtë sezon, duke e shënuar një gol dhe duke kontribuar edhe me një asist. /Gazeta Express