Kryetari i të ashquajturit “Shtab i Krizës” në veri të Mitrovicës, Goran Rakiq, në një konferencë të jashtëzakonshme me gazetarë, ka thenë se Lista Serbe do ta dërgojë në Kushtetuese vendimin për formimin e Ushtrisë së Kosovës. Ai ka siguruar serbët se Ushtria e Kosovës nuk do të guxojë kurrë të shkelë në veri, pa e pyetur Serbinë”, shkruan Gazeta “Zëri”.
Serbët e veriut të Kosovës, posaçërisht liderët e Listës Serbe, e kanë pritur në ankth përfundimin e seances së Kuvendit të Kosovës, në të cilën unanimisht janë miratuar ligjet për transformimin e FSK-së në Ushtri të Kosovës, duke shpresuar deri në fund, se Kuvendi i Kosovës nuk do ta formojë ushtrinë, pas trysnive të zyrtarëve të lartë të BE-së, por edhe të parit të forcave të NATO-s Stoltenberg.
Me miratimin e ligjeve në mënyrë unanime, anëtarët e të ashquajturit “Shtab i Krizës” në veri të Mitrovicës, i cili përbëhet ekskluzivisht nga anëtarë të Listës Serbe kanë mbajtur mbledhje të jashtëzakonshme në të cilën kanë diskutuar për hapat e mëtutjeshëm që do të ndërmerr Lista Serbe dhe shteti i Serbisë, shkruan Gazeta “Zëri”.
Pos Rakiqit, në mbledhjen urgjente të Shtabit të Krizës merrnin pjesë edhe vëllëzërit Vulloviq të Zubin Potokut, nënkryetari i Listës Serbe, Igor Simiq, ministri në dorëheqje i APL, Ivan Teodosijeviq, zëvendësministri i MPB-së, Millan Radojeviq, kryetari paralel i Mitrovicës së veriut, Aleksandër Spiriq dhe deputeti i Kuvendit të Kosovës, Sllavko Simiq.ZËRI