Për votimin e platformës për dialogun aktualisht nuk ka as datë për seancë dhe as mbështetje.
Kryesia e Kuvendit të Kosovës ende nuk ka caktuar seancë se kur ky dokument do të dalë për votim, në të cilën pritet që dy partitë opozitare, LDK-ja e LVV-ja, ta kundërshtojnë.
Analistët vlerësojnë se duhet konsensus i spektrit politik në çështjet nacionale siç është kjo e dialogut.
Për platformën e dialogut me Serbinë ende nuk është caktuar seanca se kur ajo do të dalë për votim në Kuvendin e Kosovës. Por kjo platformë, e cila u përgatit nga ekipi negociator, pritet të mos ketë mbështetje nga dy partitë e mëdha opozitare, të cilat e patën kundërshtuar edhe Ligjin për Dialogun.
Për Lëvizjen Vetëvendosje platforma përmban shumë mangësi dhe si e tillë është e papranueshme, përderisa analistët politikë vlerësojnë se është shumë e rëndësishme që të ketë unitet të spektrit politik në procesin e dialogut dhe në përmbajtjen e kësaj platforme, shkruan Zeri.
Të martën në një konferencë për medie kryeministri i vendit ka theksuar rëndësinë e përfshirjes në procesin e dialogut të dy partive opozitare, LDK-së e LVV-së, me të cilat ai u shpreh se është munduar të konsultohet për këtë çështje.