Gjykata Themelore në Prishtinë, dega në Lipjan, të mërkurën, ka shqiptuar dënim me dy muaj burgim dhe 200 euro gjobë me kusht, ndaj të akuzuarit për veprën penale “vjedhje e shërbimeve komunale”, N.T
Dënimi me kusht nuk do të ekzekutohet nëse në periudhën një vjeçare, i akuzuari T. nuk kryen vepër tjetër penale.
Aktgjykimi ndaj tij është shpallur nga gjykatësi, A. Gashi, pasi që i akuzuari paraprakisht e ka pranuar fajësinë për akuzën me të cilën ngarkohet, raporton “Betimi për Drejtësi”.
Pas kësaj, i akuzuari T, ka deklaruar se dëmin e shkaktuar, në tërësi ia ka paguar të dëmtuarës dhe nuk ka për ta përsëritur më këtë vepër penale.
Ai ka kërkuar nga gjykata që me rastin e caktimit të dënimit të ketë parasysh se është i gjendjes së dobët ekonomike, ashtu që t’i shqiptojë një dëmin sa më të butë.
Pranimin e fajësisë nga ana e të akuzuarit nuk e ka kundërshtuar prokurori R.P, i cili ka thënë se pranimi i fajësisë është bërë në mënyrë të vullnetshme nga ana e të akuzuarit dhe njëkohësisht ka kërkuar nga gjykata që të njëjtin ta shpall fajtor dhe ta dënojë sipas ligjit.
Gjyqtari Gashi, të akuzuarin e ka obliguar që t’i paguaj në emër të paushallit gjyqësor shumën prej 20 euro dhe për fondin e kompensimit të viktimave, shumën prej 30 euro.
Ndryshe sipas aktakuzës i akuzuari T, prej datës së pavërtetuar e deri më 26 shtator 2017, në shtëpinë e tij në fshatin Gadime e Ulët, me qëllim të përvetësimit të sendeve të huaja të luajtshme, që vetit t’i sjell dobi pasurore, e ka shfrytëzuar energjinë elektrike pa autorizim të furnizuesit përkatësisht KEDS-it.
Në aktakuzë thuhet se i akuzuari përmes njehsorit elektrik ka pasur lidhje direkte përmes një kabllo duke u kyçur në rrjet të ri jashtë pikës matëse, në atë mënyrë që energjia e shpenzuar nuk është regjistruar përmes njehsorit, me ç‘rast të dëmtuarës KEDS i ka shkaktuar dëm material në shumë prej 211.38 euro.
E me këto veprime, sipas aktakuzës, i akuzuari T, akuzohej se e ka kryer veprën penale “vjedhje e shërbimeve komunale” nga neni 320 të KPRK-së.